فاطمة مشكور، صديقة عندي فاللائحة، كانت مزوّجة بلبناني، و عندها معاه ثلاثة ديال الأبناء مقيمين حاليا في كندا مع طليقها.
الأمومة و الكبدة ما خلاّوهاش تعيش بعيدة عليهم، حاولات بكل الطرق باش توصل عليهم و تبقى قريبة ليهم.
من لي رجعات من لبنان و السيدة غا تحماق، ما تتاكل ما تتشرب، اللي فيها ما مهنّيها، وليداتها بعاد عليها و هي ماصايبة ليهم جهد.
شافت تا عيات و هي تقول الحلّ هو زواج أبيض مع شي حدّ يدّيها لأوروبا، عاد من تمّا تاخد ڤيزا بسهولة لكندا، واحد السيد من معارفها قال ليها بأنه تيعرف واحد السيٌد مقيم فبلجيكا فمدينة Verviers يقدر يخرّجك، راه تيحرّگ الناس بهاد الطريقة.
عيّطات ليه فاطمة و عطاها النمرة ديال مّو فسلا، إتافقات معاها على خمسطاش لمليون سنتيم، تعطيها النص دابا، و النص من بعد.
المُرشّح لهاد الزواج الأبيض هو ولدها الثاني المقيم كذلك فبلجيكا، جا هاد السيّد اللي سميتو (س) و دارو العقد و مشا ترجم لوراق و رجع فحالو لبلجيكا باش يدفع الڤيزا.
الطلب ديالو ترفض حيت السيد ما عندوش الدار تمّا، و هنا غا يبدا مسلسل طويل و مقوّد.
تبّعو معايا، و ما تزابّيوش.
عيّط ليها خو الزوج الأكبر، اللي هضرات معاه فالأول و قال ليها، خاصك تسيفطي ل (س) ديك السبعة و نص اللي بقات باش يكري الدار هنايا و يعاود يدفع لوراق.
عطات لفلوس لمّو، و بقات تتسنّى فاطمة، دازت مدّة قصيرة و هو يرجع الزوج الأبيض من بلجيكا لدارهوم فسلا، و بالضبط فحي شماعو، بقا جالس فدارهوم، و فاطمة تتسنى في فاس، هزّات ساكها و مشات لعندهوم باش تعرف شنو واقع.
و هنا غادي تبدا الخطّة الثانية لهاد العائلة، الأم ديال راجلها الأبيض قالت ليها نتي رتاحيت ليك و ولدي عجبتيه بزااف، وما كرهناكش تكوني مرتو بصّاح و تمشيو تعيشو بجوج فبلجيكا، فاطمة لقات راسها فوضع لا تحسد عليه، لكن قالت على ودّ وليداتي نصبر و ندير ليهم خاطرهم حتّا نخرج من هنايا.
هاد الأم شافت فاطمة جايّة من لبنان و عائلتها ميسورة، قالت هادي همزة ما خاصناش نزگلوها، خبيزة جابها الله.
بقات جالسة معاهوم فاطمة فالدار، السيد ناشر قل...ه لا شغل لا مشغلة، كرات ليه فاطمة الطوموبيل، و بقا عاطيها غير للدوران و الشراب، و هي مسكينة تتحسب فالسوايع و فالأيام.
داك السيد اللّي ضبّر ليها على هاد الموصيبة فالأول عيط ليها من بلجيكا و قاليها سمحي لي بزاف ورّطتك فهاد الكارثة، راها خو راجلك دار فاييط هنا للشركة ديالو و الإفلاس دارو بسميت راجلك (س) و راه دابا ميقدرش يعاود يدخل لبلجيكا حيت عليه ديون وصلات لميتين مليون سنتيم.
هنا الحلم ديال فاطمة تبخّر، مشات خمسطاش لمليون، و مشات أوروبا، و حصلات مع زوج بطالي و نصّاب، ومن فوق هادشي طاحت حاملة معاه بسبب خطأ فلحساب.
ما بغاتش دير الكورطاج، فالت مع راسها ربّما سيدي ربي قاليها أن هاد لوليّد يقدر يعوض ليها شويا فراق فلذات كبدها الثلاث.
خلاّتو، و صبرات على هاد المُصاب الجلل.
هادشي كامل و الضربة القاضية مازال تتوّجد فيها الأم ديال هاد الزوج الأبيض، واحد النهار فاطمة جالسة فبيتها فسلا عندهوم، و هي تدخل عليها تتبكي و تترعّد، عتقيني عتقيني ولدي لكبير فبلجيكا غا يدخل للحبس إلى ما خلّصش خمسة و ثلاثين مليون، نعطيك شيك و تنواعدك غادي نردهوم ليك كي يتحل الموشكيل، أييه خمسة و ثلاثين مليون، مليون ينطح مليون، أنا دابا تنتكتب و تنترعد، أنا يدّي ليا شي واحد غير عشرالاف ريال نطيّح عليها بطانة.
خدات الأم النصابة لفلوس و عطاتها الشيك، دازت مدة فاش مشات تخلّص فيه فاطمة لقاتو شيك مزوّر.
هنا حسّات فاطمة مشكور بأنه طاحت فأيدي عصابة محترفة ديال النصب، هزّات حوايجها و رجعات لفاس، باش تنوض تطلب الطلاق.
الأم السلاوية ديال راجلها خافت لا تمشي تدّي الشيك للبوليس و هي توجّد ليها الخطّة الثالثة، عيّطات ليها وقالت ليها راه (س) دار كسيدة و نقدرو نطلبو ڤيزا باش يمشي يداوا فبلجيكا، و إلى بغيتي ندفعو ليك معاه الفيزا بشرط تنازلي لينا على الشيك ديال خمسة وثلاثين مليون، و غادي نردو ليك لفلوس طريطات كل شهر.
المكلّخة ديال فاطمة تاقت بيها فحال دايرة ليها السحور، مشات معاهم للسفارة دفعو للڤيزا و فلعشية دارت ليهم التنازل فالمقاطعة.
دازت مدة و هو يترفض ليها الطلب حيت السي الزوج المحترم عندو الدوسي موسخ فبلجيكا لدرجة حيدو ليه لاكارط ناسيونال البلجيكية.
هادشي كامل باش تمشي تشوف وليداتها فكندا.
فاطمة رجعات فحالها، لفلوس مشات، الڤيزا مشات، و بنيتة فكرشها.
من بعد مدة ولدات رنيم و طلبات الطلاق.
مستخقات الطلاق و النفقة ما بغاش يخلّصها.
مؤخرا فاش سهل عليها الله وخدمات و قدرات تحصل على ڤيزا بسهولة، وليداتها غا يجيو لبنان و قررات تمشي تشوفهوم، لكن خرج ليها موشكيل كبير هو خاصها الموافقة ديال الزوج الابيض باش تقدر تسافر مع رنيم بنتها.
فا هنا العائلة السلاوية استغلو الفرصة باش يزيدو يدمروها و يحطموها، اشترط عليها الزوج تنازل ليه على النفقة و ستة دلمليون من لفوق لا بغات يسني ليها على الموافقة.
فاطمة مشكور مسكينة طيّحاتها الأقدار فيد عائلة تتتعيش على النصب، عندها سوابق عديدة فالنصب الولد لكبير تينصب فالخاريج و الام تتنصب فالداخل، و تيتبجحو بأنهم عندهوم لمعارف فلمخزن و محميين.
فاش مشات شكات قالو ليها واش عندك الشهود على عملية النصب، و عاد تيهددوها هاد الناس بأنه غادي يلصقو ليها موتيف و يسيفطوها للحبس.
فاطمة مشكور عيات و تحطّمات ووتناشد المسؤولين فلبلاد و على رأسهم جلالة الملك يتدخل و ينصفها و يجيب ليها حقّها من هاد العائلة اللي تتمتهن النصب و الإحتيال.
تعليقات
إرسال تعليق