هذا هو إدريس لشگر

هذا هو إدريس لشگر

إدريس لشگر، 62 سنة، تزاد فتغجيجت نواحي گلميم، إجازة فالحقوق من جامعة محمد الخامس و محامي بهيأة الرباط، متزوج و أب لبنتين و ولدين.

سياسي محنّك (مربّي لحناك)، من صغرو و هو فالإتحاد الإشتراكي، بدا فالكادي، الجينيور و دابا مع المخضرمين دالحزب.

تنتاخب ف 2012 زعيم لحزب الوردة فالمؤتمر التاسع خلفا لعبد الواحد الراضي.

دخل للبرلمان أول مرّة ف 1993 و رجع ليه ف 2002 و 2011.

المحاماة بداها من 1982 و من بعد ما دخل للسياسة و التخلويض، جاب الدراري سطاجيير شادين ليه الملفات فالبيرو بالإنابة.

هاد السيد فالعهد ديالو حزب الإتحاد الإشتراكي توفى و مات الله يواليه برحمة الله، بقا فالحزب غير الجورنال ديالو اللي تيفكّرنا بيه.

داكشي اللي بناه بوعبيد و من موراه عبد الرحمان اليوسفي، جا هو هدمو فربع سنين، الحزب من بعد ما كان ديما تيجي الأول الثاني فالإنتخابات ب 100 نائب فالبرلمان، ولى تينجح غير هو و الراضي حيت تيجيبوهم وكلاء اللائحة فالراس.

تعيّن مرّة وحدة وزير فحكومة عباس الفاسي ف 2009 مكلف بالعلاقات مع البرلمان و ما فاتش فيها عام و نص و قرقبو عليه، لكن ربح تقاعد ديال جوج فرنك مدى الحياة.

إدريس لشگر حتا هو طلع من خدّام الدولة واخا ما فاتش فالخدمة عام و نص، استافد من بقعة فالرباط ربعالاف متر كاري ف 2002 بسبعالاف ريال للمترو، و عندو بقعة أخرى فيها 600 مترو فحي النهضة و دار كبيرة فشارع مدغشقر.

و بقعة أرضية فمراكش يالله سالا الڤيلا الفاخرة اللي بنا عليها و تا هي بسبعالاف ريال للمتر كاري.

هادشي غير اللي خرج للوجود و ما خفي كان أفظع.

إدريس لشگر تقدمي فالأفكار ديالو، و باغي المساواة بين الجنسين فكلشي حتا فالإرث، و تيدافع على الديمقراطية و حقوق الإنسان.

لكن هاد لهضرة كاملة غير باش ينعّس بيها لحوالا ما بين يقضي الغراض تا هو و يحلب من البزولة ما حدّها عامرة بلحليب.

#الإتحاد_الإشتراكي_مدرسة_نيت