العائلة الإقطاعية في الغرب : تريكت الراضي

ياسين الراضي

ياسين الراضي، تزاد سنة 1990، مواطن مغربي ماشي كباقي المواطنين، حيت هو ماشي بحالهم...

ياسين تزاد فسيدي يحيى الغرب، خدا البكالوريا ديالو شعبة علوم اقتصادية ومشا لكندا يكمل قرايتو؛ ساعا "خونا ياسين" غادي يرجع وغادي يولي مقاول وعضو فحزب الاتحاد الدستوري، حزب ديال المخزن، هو اللي عندو الشعار ديال العود، حزب المؤسس ديالو هو المعطي بوعبيد؛ الوزير الأول السابق فعهد الحسن الثاني...

فسنة 2011، اللي وقع فيها الصداع فالمغريب وخرجوا الشباب الأحرار والشداد باش يغوتوا، ويطالبوا بالحقوق والكرامة والحرية، خونا ياسين طلع هو أكبر مستفيد بل صدق هو "الشاب القافز الأول فالمملاكا" : ماشارك لا فحراك لا والو، مانزل للشاريع وما جات فيه زرواطة؛ ترشح فالإنتخابات السابقة لأوانها اللي تنظمات نهار 25 نونبر 2011؛ اللي ضربات فيها العدالة والتنمية 107 مقعد...

الشاب ياسين ربح وأصبح يحمل لقب "أصغر برلماني فالبرلمان المغربي"

الشاب ياسين باباه هو إدريس الراضي، القيادي المخضرم فحزب الاتحاد الدستوري "مول الغابة" اللي معنا عليه ابن كيران فمجلس المستشارين وقاليه "بنادم يشوف شنو عندو فالكرش ديالو" ؛ وكان جواب الراضي هو أنه تعرا عليه فالبرلمان أمام الكاميرات وقاليه "ها هيا كرشي" . وللإشارة كرشو كان فيها الزغب...

الشاب ياسين عمو هو عبد الواحد الراضي، اقدم برلماني فالمفريب والكاتب الأول السابق لحزب الاتحاد الإشتراكي ورئيس مجلس النواب سابقا ووزير العدل "المستقيل" فعهد حكومة عباس الفاسي...

الشاب ياسين ضمن تقاعد مريح، ضمن 8000 درهم شهريا، مدى الحياة، حتى يعكدهوم؛ بعدما خمس سنين هادي وهو كيضرب ربعة د المليون فالشهر...

الشاب ياسين ماعمرو مابان فالبرلمان، وماعندو حتى شي إنجاز يذكر...

وانت أختي المتابعة/ أخي المتابع بقا تحفظ وتقرا وتسهر الليالي وداركوم يتقطعوا باش يديروا ليك المراجعة؛ باش فاللخر تبقا تشد حزقة اللاروب.

كون بحال الشاب ياسين، ولا سير تقود مع احتراماتي العميقة لك

ب.س : لائحة البرلمانيين الشباب طويلة، ولكين خونا هو الصغير فالبازار كامل.