هذه هي زوجة صلاح الدين المزوار
 |
| هذه هي زوجة صلاح الدين المزوار |
صلاح الدين المزوار، 63 عام، من مكناس، رجل أعمال و سياسي، متزوج من الصحفية التونسية كريمة بولحية، و عندو منّها جوج وليدات سارة و يوسف.
صلاح الدين المزوار عندو دبلوم الدراسات المُعمّقة من جامعة غرونوبل بفرنسا، و دبلوم السلك العالي من المعهد العالي للتجارة و إدارة المقاولات ف 1979.
كان لاعب سابق ديال المونتخاب دالباسكيط، و كان نائب رئيس الرجاء البيضاوي لكرة السلّة.
فاش شدّ الدبلوم مشا خدم فدار الضّو فطنجة كمسؤول مالي، من بعد مشا لمكتب إستغلال الموانيء فنفس لمدينة دوز فيه شي ربع سنين و هو يسمح ليهم فالوظيفة العمومية.
هز ساكو و مشا لتونس باش يخدم فشركة فرنسية للنسيج و تمّا غادي يتعرّف على المدام ديالو.
من بعد غادي يرجع للمغريب و غادي يخدم مع شركة إسبانية ديال النسيج ف 1991 فسطّات قبل ما يترقّى و يولّي المدير التجاري ديالها فشمال إفريقيا و الشرق الأوسط.
ف 1996 غادي تبدا رحلتو مع السياسة و غادي يتنتاخب رئيس غرفة التجارة و الصناعة فسطّات.
ف 1994 غادي يلتاحق بحزب التجمع الوطني للأحرار.
ف 2004 غادي يعيّنو المليك وزير للصناعة و التجارة فحكومة إدريس جطّو.
ف 2007 غادي يعاود يعيّنو هاد المرّة كوزير للمالية فحكومة عبّاس الفاسي.
ف 2010 غادي يدير محاولة إنقلاب ناجحة على رئيس الحزب مصطفى المنصوري و غادي ينصّبوه الزعيم القائد المُفدّى لحزب التجمع.
ف 2011 من بعد تعديل الدستور و داك لخواض اللي تطبخ بإحكام، غا يحاول يبرزط حزب العدالة و التنمية العدو اللذوذ ديالو أنذاك، و غا يدير تحالف من سبعة دالأحزاب باش يدخلو الإنتخابات، لكن غا يخسر و ينهزم و غا يشوّهو مزيان بن كيران فالفيديوهات الشهيرة ديالو.
ف 2011 نيت غادي يولّي نائب برلماني.
لكن من بعد ما خرج حزب الإستقلال من الحكومة، سبحان مبدل الأحوال ولاّو صحاب و حباب و ضحٌا بن كيران بصاحبو العثماني الدرويش و جاب المزوار بلاصتو فوزارة الخارجية ف 2013.
صلاح الدين المزوار من نهار دخل للحكومات المُتعاقبة و الفضائح تابعينو، ف 2011 قبل ما يغادر وزارة المالية، خدا شيك ديال 250 مليون سنتيم دارو فجيبو كمكافأة نهاية الخدمة، و عطا ملايين السنتيمات من فلوس الشعب لموظفي الوزارة.
ف 2013 وكي بدا فوزارة الخارجية، تفرش مع وزير الخارجية الفرنسي لوران فابيوس فاش طلب منٌو يتوسّط ليه عند شركة ماكينزي الأمريكية باش تخدم فيها بنتو سارة، و داكشي اللي كان نيت.
فنفس العام غادي يتشوّه تشويهة عالمية فمطار أورلي فباريس فاش عرّاوه البوليس د المطار و داز فالسكانبر بالكيلوط، واخا كان عندو جواز دبلوماسي كوزير خارجية المملكة المغربية.
عِوض أنه يحتج و يقدّم إستقالتو، كمّدها مسكين فقلبو و رجع للمغريب و دار راسو ما كاين والو، ساعة صحاب الحسنات هزّوها سخونة للحباب هنايا و نشروها.
ف 2015 غادي تجي فضيحة التفعفيع، و الباطل اللي طيّح على وزيرة الخارجية السويدية فاش قال أنه خلعها و تراجعات على الإعتراف بالجمهورية الوهمية، لكن فرشاتو ببيان طويل عريض تتبين فيه للرأي العام الكذب و التضليل ديال السي مزوار.
صلاح الدين المزوار واخا تيهضر بثلاثة د اللغات بطلاقة، لكن يُعتبر وزير خارجية فاشل، داوي خاوي، غير مُلم بقضايا الدولة المحورية، تتحس بيه كأن شي حدّ حاطّو فداك البوسط لتنفيذ الأوامر و التعليمات ديالو.
صلاح الدين المزوار عزيز عليه الزهو و القصاير، تيسافر بزااف على نفقة الدولة بطبيعة الحال، ما تيزكلش تا شي كلاسيكو سوا فمدريد أو فبرشلونة.
وليداتو قراو فأحسن المدارس فباريس و لندن، الجنسية الفرنسية فالجيب، عندو المشاريع ديالو و مقابلها مزيان الله يزيدو.
بإختصار مزوار رجل أعمال ناجح و مخلويض كبير خصوصا فاش كان وزير للمالية.
واحد اللي زغبو الله و طلب مساؤلتو فالبرلمان، كان عبد العزيز أفتاتي ديال البيجيدي، لكن كان الجواب هو تجميد عضويتو فحزب العدالة و التنمية و مشات على عينو ضبابة مسكين، داروه كبش فداء ضحاو بيه مقابل التحالف و الأغلبية الحكومية، و كافؤو مزوار بوزارة الخارجية، من بعد ما حيدّو العثماني الرجل الطيّب.
صلاح الدين المزوار عندو بعض الأحداث و اللقطات الإستفزازية، على سبيل المثال صورة المواطنين اللي تيبوسو ليه يدو فالرباط.
صلاة الجمعة فمالي فاش كان وراء المليك، الناس تتصلٌي و هو ما مسوّقش.
و أخر حاجة الفيديو ديال الجلسة الخمرية مع الريوسا لكبار فالدوحة و هوما يُقارعون ما لذّ و طاب من النبيذ الفاخر و التقيوتات اللذيذة من كاجو و بيسطاش و ماجاوره.
عموما السيد وزير الخارجية عايش الحياة و مفطّح مع راسو، و من حقّو يزهى و يقصّر غير ما يكونش برزقنا و ما يكذبش علينا، حيت دابا عقنا بيه و حنا ما عندناش لگرون.
و بما أنه مازال ماعندناش عدالة و ربط المسؤولية بالمحاسبة فهاد لبلاد، فا بصحّتو و راحتو.
و حنا.... حنا..... نعل ديلمنا حنا، حنا اللي ما نسواوش حاضيينو
تعليقات
إرسال تعليق