شتان بين بوسان الرباط وبوسان فاس

بوسان فاس فوق السطوح يؤدي بالسجن

سناء ش. (16 عام) من كازا، الصورة عاليمين، و هاجر ب. (17 عام) من مكناس، جوج بنيتات فعمر الزهور، تعرّفوا على بعضياتهوم قبل ثلاث أسابيع فهاد الفضاء الأزرق الفيسبوك.

ربطوا علاقة و إرتاحوا لبعضياتهوم و قرّروا يخرجو من الإفتراضي للواقيع، و دارو موعد يتلاقاو فمراكش باش يمشيو يجلسو شي يامات عند خالة سناء.

هاجر فتاة اللي ظروفها صعيبة شويا، خرجات من دارهوم هادي عام، و عايشة متنقّلة من مدينة لمدينة، و كاتبات غير فالجرادي و محطّات الكيران، إضطرّات تقطّع شعرها و تلبس حوايج الدراري باش تحمي راسها من الإستغلال و الإعتداء الجنسي.

ماماها ديكلارات عند البوليس بإختفاء بنتها، لكن هي ماشي مختفية أو غايبة، هي فضّلات تبعّد على مشاكيل لا يسع المجال لذكرها هنا.

تلاقات سناء مع هاجر و رتاحو لبعضياتهوم و دوّزو يامات جميلة فمنطقة الداوديات عند خالتها، حتا لخميس اللّي فات مشاو للحمّام يسخّنو عظيماتهوم فاش رجعوا طلعو للسطاح يرتاحو، و بما أن العلاقة العاطفية اللي كتجمعهوم بدات كتقوى، هاجر تبادلات بعض القبلات مع سناء، و بما أننا فبلاد فيها الحضية و التبركيك، شافهوم ولد خالة سناء و صوّرهوم و مشا كيجرّي عند مّو باش يوريها الفيديو.

ناضت القيامة فالدّار، صراخ و عويل و لطم، أويلي أش هاد المونكار أش هادشي، شدّوهوم صلخوهم بجوج، هاجر ديجا مهرّسة فركبتها و مازال ما براتش ليها، تعرّضات للضرب فنفس البلاصة.

عيّطو للبوليس، جاو البوليس، شدّوهوم دّاوهوم....

تقدّموا للوكيل بجوج بتهمة الشذوذ الجنسي، مع التحقيق و سين و جيم، تزادت لهاجر تهمة التشرّد حيت ما عندهاش مأوى، و تهمة حيازة صور مخلّة بالأداب حيت قلّبوا تلفونها ولقاو فيه تصاورها مع سناء.

و سناء تزادت ليها تهمة حيازة صور مخلّة بالأداب حيت تاهيا لقاو عندها تصاورها مع هاجر.

سناء و هاجر بجوج معتقلات دابا فسجن بولمهراز مع السجينات الكبارات، في حين القانون كيفرض أنهم يمشيو للإصلاحية لأنهم قاصرات بجوج، هادشي خلا هاجر ما تاكلش النعمة من نهار تشدّات من هول الصدمة، و الإعتداءات بالضرب و السب من طرف السجينات حسب تصريحات الوالدة ديالها اللي جات مسكينة من مكناس باش تشوف بنتها و ما خلاّوهاش تشوفها حتّا اليوم، السيدة حالة ضعيفة و ما كتعرف حدّ و ما قادراش دير حتا موحامي.

عكس سناء اللي لقات مؤازرة و مساندة من طرف عائلتها اللي وكّلو ليها موحامي، حيت ما توقعوش أن بنتهوم تاهيا تشدّ و دخل للحبس.

هاجر وقّعات على مجموعة من المحاضر بلا ما تقراهوم، و القضية خدات أبعاد أخرى و إتجاهات أخرى و هادشي كامل بسباب بوسة فالسطاح.

الغريب أن مصوّر الفيديو الدليل المادي اللي إستندات عليه النيابة العامة فإعتقال الفتاتين ما تجبدش فالتحقيقات، و كيفاش صوّر داك الفيديو، و واش تصوير الفيديو أصلا عمل قانوني و لالا.

عالعموم، وضع الفتاتين النفسي و الصحي سيئ للغاية، و مُعرّضتين للحبس ثلث سنين من أجل بوسة،

توصّلت بصورة ليهم بجوج و هوما كيبوسو بعضياتهوم، و فضّلت عدم نشرها، لكن هي صورة عادية جدّا، و حتّا لا ماشي عادية، هاديك حياتهوم و حرّيتهوم الشخصية، ما باسوش بعضياتهوم فالشارع العام أو فمكان عمومي، باسو بعضياتهوم فسطاح كانوا منشورين فيه لحوايج مصبّنين و كانوا كيشوفوهم فقط طباسل ديال البارابول و سيدي ربّي.

#الحرية_لهاجر_و_سناء

#لا_للفصل_489

بوسان الرباط تحتفل بك الصحافة الوطنية والدولية