شاهد من أمروا بتغليب المصلحة الوطنية على العامة
 |
| الحكامة الجيدة |
هادو هوما لي دعاهم ملك البلاد يوم أمس الى تغليب المصلحة الوطنية ؟! 😂
ملي تفرش لشكر لي كان كيضرب على راسو فحقيبة العدل بدون إطلاع كل قياديي الحزب بتفاصيل مفاوضات التعديل، و فاللخر قالو ليه سير تكمش وعطاوها لبنعبد القادر الذي وصف اللغة العربية باللغة "الميتة"، الإتحادي لي جاي من البام و ما بينو و بين الإتحاد الاشتراكي غير الكاسكيتا، يعني تقنيا، الإتحإد الإشتراكي اصبح خارج المحكومة، بسبب التنوعير ديال بوحناك و تسييره للحزب بحال زريبة باه، بعدما باع الحزب هو و عصابتو بجوج حقائب وزارية و رئاسة "بر لامان" كثمن للبلوكاج. ليلة الإعلان عن المحكومة الجديدة ناضت قربالة فمقر الإتحاد الإشتراكي، لشكر هرب من المقر و طفا التلفون، كبار القياديين تبرؤوا من استوزار بن عبد القادر، و طالبوا بإقالة المكتب السياسي و الإنسحاب من المحكومة...
المضحك فالامر، هي "القيادية" و البرلمانية عن الفريق الاشتراكي، مينة الطالبي المحامية التي تدافع عن "ضحايا" بوعشرين، لي دارت فيها مناضلة ثورية وخرجات تهلل فموقع إلكتروني كتحيح عليه على أساس انه لم يفاوض جيدا و نحن متذمرون و بلا بلا بلا ....
سيدتي البوّاسة 😂، آش عند بيدق بحالو مايفاوض ؟!! و زايدينها نتي و رفيقتك في الحزب فتيحة سداس البرلمانية الأخرى عن الحزب مولات فضيحة صفقة 70 مليون ديال التعاضدية في عهد الشفار المعفي مؤخرا عبد المومني ، لي شبكتيها معاها وسط البرلمان، غالبا الشجار كان من اجل المصلحة الوطنية 😂، كل وحدة جابدة عليه سيفي هالعار باغا نستوزر، بلا حشمة بلا حياء، المحكومة فقاموسكم هي الحمام التركي ؟!
طالقاها علينا و نسيتي سيدتي انك اكثر وحدة استفادتي فزمن الزعيم المحنك كبرلمانية ريع حزبي و استفادتي كذلك من صحيبك مدير الديوان ديال الهجرة عند بنعتيق، لي خدم ليك خوك فالديوان وهو مطرود من النقابة بسبب عرام ديال الملفات ديال التحرش الجنسي ؟! معلم عندو تاريخ اسود فالتحرش، و لا خبرة له بالخارجية، و باش ما يتسخخ فالدواوير بحال المعلمين ولاد الشعب مع ولاد الشعب، يولي مستشار فشؤون الهجرة كيضرب 15 الف درهم بدون احتساب التعويضات، ومعندو تا مقال عن الهجرة ولا عن الخارجية. 😂
اش غنقوليك، بغيت نقوليك سيري كوني تحشمي و لكن تفكرت فعلتك مع رئيس المحكومة فقصر المؤتمرات فالصخيرات، عرفتك ماعندكش الكمارة علاش تحشمي 😂...
صدق من قال :
إذا كنت في دولة النفاق.. فاعدل بساق ومل بساق
ولا تحقق ولا تدقق.. وانسب شاما إلى عراق
ولا تخاصم ولا تصادق.. وقابل الكل بالعناق
فأي شئ كأي شئ.. بلا اختلاف ولا اتفاق.
تعليقات
إرسال تعليق