علاش معندناش أعمال محلية تتناول ظاهرة التدين والشيوخ والتطرف وداعش..

القاهرة كابول, الاختيار, العائدون, بطلوع الروح, جزيرة غمام,

ما تتفرج ف "القاهرة كابول" و ف "الاختيار" وف " العائدون" و ف "بطلوع الروح" وحتى ف "جزيرة غمام" والصراع لي فيه بين انواع ثلاثة من التدين، تتجيك الغمة والأسف علاش معندناش أعمال محلية تتناول ظاهرة التدين والشيوخ والتطرف وداعش...

وقعات عندنا أحداث 16 ماي ، عشرات الخلايا، شياب هاجروا للعراق وسوريا وقتل منهم مئات، أسر عانت مع التطرف اما من طرف الاب أو الابن ومآسي وعشرات القصص، آلاف من الناس سجنوا ضمن هذه الملفات وكل واحد منهم قصة لوحدها، هدشي كلوووو معطاش فكرة لشي كاتب سيناريو ولا شي منتج يدير عمل على هدشي؟ علما ان كل مكونات الفرجة كاينا، الرسالة والإثارة والأحداث يعني الفرجة مضمونة..

غي أنا شخصيا شحال عندي من قصص حقيقية وواقعية، مئات القصص بلا متحتاج لا لخيال ولا إبداع، علاش المنتجين والمخرجين تيتهريو من هاد المواضيع، عشرين سنة والمغرب يعاني مع التطرف والنتيجة عمل وحيد ديال نبيل عيوش؟ لا أعمال توثق لما حدث في هذه الفترة، ولا أعمال ترسل رسائل للتحذير من الوقوع ف هاد المسالك...

نتمنى أن المنتجين والمبدعين ديالنا يعطيو فرصة لمثل هذه الأعمال، خص غي الإتقان والإبداع ف الكتابة والتصوير والاخراج ، أما القصص فموجودة وحقيقية وقمة ف الاثارة والتشويق